شهدت منصات التواصل الاجتماعي موجة غضب بعد الأزمة المرورية الخانقة التي شهدتها عمان صباح اليوم، رغم تأكيد أمانة عمان الكبرى أن الطرق سالكة و إعلان إدارة السير المركزية فتح الجسور المغلقة

حيث نشر  النائب محمد الظهراوي : من الرصيفة للجامعة الأردنية ساعتين ونص أزمة خانقة ما بيوصل الموظف دوامه إلا هو منتهي !

و علق محمد : بسبب الجهل لما تأجل الدوام الساعة عشرة لكل المملكة ويطلعو مره وحده أكيد رح يصير هيك بس كان المفروض تعطيل المدارس اليوم وتعويض يوم الأحد بدوام يوم السبت اللي أصلا بكون فيه الدوائر الحكومية معطلة

و قالت وديعة : يوم بارد متل باقي الأيام وما كان في داعي للقرارات الغير مدروسة بتأخير الدوام بس عملتوا أزمة وشوشره
المفروض القرار يلتغي لبكرة وبعده

وعلق أحمد : يعني الناس اللي بتحكي قرارت غلط حابين تطلعو عالفجر و تموتو من الزحاليق والانجماد ؟ مهو إذا واحد عمل حادث عمان كلها بتسكر ، إذا والشوارع منيحة نص السواقين مابعرفو يسوقو كيف بالصقيع !

و أضاف علاء : أنا دوامي الساعة 10 طلعت الساعة 8:30، ووصلت دوامي بكل أريحية وقبل دوامي بنصف ساعة، لكن عقول الموظفين مترهلة أكيد كلهم طالعين الساعه 9:30

و كتبت نور : شو مشكلتهم يخلوا دوام بعض القطاعات اون لاين؟ يعني ما تعلموا من كورونا ما في دروس مستفادة من التجارب؟ أصحاب القرار وين خبرتهم وبعد النظر الي عندهم؟

كان هذا أبرز ما تداوله رواد مواقع التواصل الإجتماعي لهذا اليوم، في أمان الله …