عزيزي المرشح.. شايفنا خِرفان مثلا !!
عزيزي المرشح.. أرجو أن تتقبل مني برحابة صدر ما فهمته من شعاراتك الانتخابية التي كانت بعيدة كل البعد عن الواقع والمنطق خلال الأيام الماضية.
• عزيزي المرشح بالنسبة لشعار (أنا صوتكم القوي)..حضرة جنابك صباح فخري مثلا!!
• عزيزي المرشح بالنسبة لشعار (الأردن بده صوتك).. هو الأردن ترك كل هالناس وشكالك أنت بالذات مثلا!!
• عزيزي المرشح بالنسبة لشعار (معا نبني الأردن).. بلا حيا منك أنت (طوبرجي) مثلا!!
• عزيزي المرشح بالنسبة لشعار (أنا واحد منكم).. انضيفك على دفتر العائلة، ونحسب حسابك بالورثة مثلا!!
• عزيزي المرشح بالنسبة لشعار (صوتكم المسموع).. تغطيتك مثل تغطية شركة (زين) مثلا!!
• عزيزي المرشح بالنسبة لشعار (لن تغمض لنا عين).. أنت الدفاع المدني مثلا!!
• عزيزي المرشح بالنسبة لشعار (الوطن وحقوقكم.. مهما غلا الثمن).. إلي على واحد خمسين ليرة دين بتعطيني إياهم مثلا !!
• عزيزي المرشح بالنسبة لشعار (إلا.. بالتغيير).. طيب بالتصفير.. ما بمشي الحال مثلا !!
• عزيزي المرشح بالنسبة لشعار (أنا خادمكم).. والله خجلتنا.. بتحب تبلش في المطبخ ولا بغرفة القعدة مثلا !!
• عزيزي المرشح بالنسبة لشعار (حان الوقت لمحاسبة الفاسدين).. أنت بتتخوث علينا مثلا !!
• عزيزي المرشح بالنسبة لشعار (الشعب يريد).. نلاقيك على دوار الداخلية مثلا !!
• عزيزي المرشح بالنسبة لشعار (لن نساوم على حقوقكم).. شايفنا خِرفان مثلا !!
• عزيزي المرشح بالنسبة لشعار (معا لنقضي على الفساد).. حضرتك بف باف مثلا !!
• عزيزي المرشح بالنسبة لشعار (بدي حقي ).. طيب أنا (بدي شاورما) وما بدي (حقي) ما أعطيك صوتي مثلا !!
عزيزي المواطن: بالنسبة لكل تلك الشعارات التي تخص حضرة جنابك وما عندك غير هالصوت.. ناوي تلعب (فَنِّه) بينهم مثلا!! .
العرب اليوم