04/25/2022 - 15:06

جدل كبير يجتاح مواقع التواصل الاجتماعي حول موضوع زواح القاصرات حيث طالب نشطاء السوشال ميديا بتشريع قوانين لمنع زواج القاصرات وجاء ذلك بعد ارتفاع حالات الطلاق وبحسب تقرير أن ٥٠٪؜ من المتزوجات في سن ١٨ عام او اقل يتركن المدرسة

كتبت سارة نصري: الي بأيد زواج الاطفال

الطفلة الي عمرها ١٥-١٧ سنة شو بفهمها بالمسؤولية وبيت وحياة وتربية اطفال

كل مفهومها عن الزواج بكون بدلة بيضة وطرحة وعرس ورقص وصاحبات 🤷🏼‍♀️

والي بحكي حماية لطفلة على شان ما تزني ، الاولى انك تربيها صح وتعرفها الصح من الخطأ

وتعرفها الشرع ومخافة الله

وعلمياً في اطفال لعمر ١٦ او ١٧ لسا اجسادهم مش مهيئة للحمل والخلفة

أما بتول ابو الزينات: مش فاهمه في ناس جد شايفه انه صح تطلع بنت من المدرسه وتجوزها وهي مش مخلصه توجيهي اصلا

وكتب أحمد:الرسول تزوج عائشة وهي بعمر التسع سنوات انا ما بشوف الموضوع غلط كبير ولكن اذا كان الزوج فاهم متطلبات هاي الطفلة الي بده يوخدها وقادر يعيش معها ويتعايشو فخلص يتزوجوا

وتفاعلت وفاء: والله انا شايفة الموضوع مش بتزويج القاصرات او غيره

احنا لسه بنعاني من العقل الذكوري المتحجر .. يلي مفكر حاله محور الكون..

خذولكم لفة ع المحاكم وشوفوا قضايا الطلاق يلي سببها الجهل ..

عمومآ في بلادنا العربية ماوقفت عند هذا الموضوع

مليان عندنا مواضيع طرمة بدها علاج

واضاف معن الشوبكي:على اساس لو حطو قوانين راح تخف هالظاهرة؟ما اعتقد

لانو في بكثير عيل ع سن معين خلص البنت لازم تتزوج مين ما كان ومين ما اجا لازم نحارب الجهل قبل القوانين

ونختمها مع آية العزة:الزواج ما اله سن معين الفتاة القادرة على الزواج والانجاب والمسؤولية تتزوج

لانه مستحيل ع ١٧ ونص قاصر وعلى ١٨ راشدة!!

كانت هذه مجموعة من تعليقات رواد مواقع التواصل الاجتماعي مع زواج القاصرات.