٤٠ دينار للقميص الاسود و٢٧ دينار للقميص الأبيض والأحمر 
بعد إطلاق الاتحاد الأردني لكرة القدم حملة "قريبا" للإعلان عن قميص جديد للمنتخب الوطني الأردني وطرحه بأسعار بين ٢٧ دينارا للقميص الأبيض والأحمر 
والقميص الاسود بمقدار ٤٠ دينار.

هذا الخبر اثار تفاعل العديد على منصات مواقع التواصل الاجتماعي

فعلق حمزة:٤٠ دينار شاملة التذاكر وفوز المنتخب؟

وقال ليث: يعني مفكرين احنا بأوروبا تحطو الأسعار زيهم حرفيا أسعارنا زيهم ورواتبنا هي يوميتهم ارحمونا.

ونشر فاروق علي: عشان المنتخب وصل نهائي آسيا صار في استغلال كثير كبير من الاتحاد قبل اسيا كان التيكيت الدرجة الأولى باربعة هسا تيكيت الثانية بخمسة وموضوع التيشيرتات شو هالاسعار الله اعلم شو بدكم تعملوا لو وصلنا كاس العالم.

وأضاف محمد: الواحد يادوب يشتري تذكرة بالدوري بثلاث دنانير وأنت بتقول ٤٠ دينار

وعلق وسام: قلنالهم بدنا نصير زي أوروبا لا عملوا ملاعب ولا زادوا أعداد الجماهير ولا عملوا أكاديميات ولا زبطوا الملاعب العامة لا بس غلوا التيشيرتات.

وقال هاشم: يخوان كله نهائي الي وصلناه ليش مكبرين الموضوع إذا الوضع هيك رجعونا فيصلي ووحدات اريحلنا شو ٤٠ دينار موسى بضل تعمري ويزن بضل نعيمات يعني صلوا على النبي

ونشر أحمد: رح أجيبه من عند المحسيري بالبلد بثلاث دنانير.

كان هذا أبرز ما تداوله رواد مواقع التواصل الاجتماعي لهذا اليوم.