أثار انقطاع الكهرباء عن مناطق في عمان خلال المنخفض الجوي الأخير تفاعل وغضب رواد مواقع التواصل الاجتماعي مما اعتبره البعض تقصيرا واهمالا من شركة الكهرباء.

سمير الحياري يقول: ‏جاهزية، انقطاع غاز وكهرباء وانترنت ، شوارع مغلقة ، ادارة ازمات صورية ، بنية تحتية متهالكة ، كلها تحتاج لجلسة مكاشفة لبيان ما غطاه الثلج ..!

أما محمد غرد: وحدو الله يا جماعه الخير، المنخفض مش سهل والحمدلله انها اجت على هيك ويومين بترجع الكهرباء وبرجع كل شي زي ما كان .. كيف لو يصير اعصار شو دخل الحكومه ...حرام عليكم

وعلق فايق: خاف الله ثلاثة أيام والكهرباء مقطوعه والعطل كان بسيط وقدمنا شكاوي ولا حياة لمن تنادي ما حدا رد علينا بيصلحو الاعطال حسب المعرفة لازم مدير شركة الكهرباء والي معو يقدمو استقالاتهم ويروحو عيب اللي صار بعمان  وين 3ايام والكهرباء مقطوعه

وفي موضوع آخر تداول ناشطون عبر مواقع التواصل الاجتماعي صور تظهر عامل توصيل(طلبات)، يعمل أثناء المنخفض وخروجه سيراً على الأقدام في الظروف الجوية السيئة

ميساء قالت:كل الأكل الي شريتوه مش مكفيكم لتوصو من طلبات وتطلعوه بهيك جو؟حرام عليكم الي ما بتقبله ع حالك لا تقبلو ع هالشب حتى لو دافعينلو توصيل لولا مرارة عيشتو ما طلع بهيك جو فبلاش منو الديلفري يا برستيج

أما أحمد يتساءل:ليه مكبرين الموضوع كل دول العالم بتثلج عندها بمارسو حياتهم طبيعي الا احنا لازم نقعد بالدار ونحزن على الشب الي بوصل طيب مهو شغلو وهو قبلان فيه بالعكس هاد فخر مش اشي ينزعل عليه والله انو وحش

أما فيما يخص ارتفاع أسعار الخضار والفواكة فعبّر المواطنون عن استيائهم خلال المنخفض الجوي مطالبين المسؤولين بايقاف عن ارتفاع الاسعار

تفاعلت كوثر: اكيد بدها تغلا علينا مهو القطاع الزراعي تضرر بالموجه القطبية هاي !

بس ان شاءالله تنخفض كرمال الناس المحتاجه

ونختمها مع أروى:مهو كل شي مرتفع هي وقفت عالخضرة والفواكة والله ذبحتونا رفع اسعار والرواتب مش مكفية لإشي تاركين البلد بتتخبط ببعضها ونازلين ترفعو بهالاسعار

كانت هذه مجموعة من تعليقات رواد مواقع التواصل الاجتماعي مع انقطاع الكهرباء وصورة عامل توصيل طلبات وارتفاع أسعار الخضار والفواكه.

radio albalad · كيف تفاعل رواد مواقع التواصل مع انقطاع الكهرباء عن مناطق في عمان خلال المنخفض الجوي الأخير